［東方日報］劉松仁：佢哋怕我有臭狐 拍劇多年甚少緋聞

無綫新劇《英雄、刀、少年》昨日舉行開鏡拜神儀式，邵美琪因為信奉基督教關係，所以沒有上香，她透露由讀書時已開始信奉基督教，但直至現在仍未接受洗禮，她自覺是一個「唔乖」之教徒，甚少依時依候返教會，所以覺得未是時候接受洗禮，但她認為有信仰後心境也不同，連揸車都安全一些。

劉松仁自言與各人合作好開心，提到一眾靚女如邵美琪、楊思琦齊為他著迷，松仔笑說：「佢哋得把口，根本都無人埋身，個個都話我正，一接觸就唔正。」

松仔拍劇多年甚少緋聞，問他有何心得，他講笑說：「唔係我有心避，係無人埋嚟，可能佢哋怕我有臭狐啩。」

此外楊思琦透露劇中將會暗戀老師劉松仁，卻遭對方拒絕，她自言現實中從不會主動追求男士，問到緋聞男友李泳豪是否主動追求她，她只是一味識笑，並答謂：「朋友嚟咋。」

［蘋果日報］舞刀弄劍 睇得唔打得 楊思琦?松仔失手

楊思琦、劉松仁、楊怡、邵美琪同黃宗澤，噚日喺將軍澳電視城宣傳無綫新劇《英雄、刀、少年》。

劇裏面有好多武打場面，所以幾位主角一早做好準備工夫。松仔同思琦噚日重即場獻技，表演耍劍。馮仁昭見到松仔耍劍時功架十足，但嬌滴滴嘅思琦雖然姿勢似模似樣，但劍法一啲都唔純熟。

冇女仔敢埋身

思琦喺劇裏面鍾意咗年紀大佢好多嘅松仔，重向松仔表白，不過最終被拒絕。

現實生活中思琦都有好多緋聞，不過佢就話：「我未試過鍾意咁大年紀嘅男人，亦唔會咁主動，都係等人追多。」相反松仔拍咗咁耐戲，都好少有緋聞傳出，松仔竟然話：「冇人吼我，連唔靚嘅女仔都唔肯行埋嚟。」