［東方日報］洪永城鎅詩詠 杏兒避黃宗澤

昨日《香港國際影視展2015》在灣仔會展揭幕，無綫電視大搞「TVB 2015劇集推介暨海外業務合作記者會」，出動小生花旦大晒冷！汪明荃和劉松仁企正前排正中間，地位超然，其他位列前排的包括鍾嘉欣、黃宗澤、謝安琪（Kay）、鄭嘉穎、胡杏兒、黎耀祥、田蕊妮、馬國明、楊怡及陳展鵬，備受力捧的陳凱琳則於第二排站在蕭正楠身旁。

謝安琪透視長腿

處女下海拍劇集《殭》的Kay，夠「殭」地以黑色透視喱士裙上陣，大晒長腿。提到同劇的陳凱琳露背，她笑說：「露背係trailer啫，只係營造氣氛，劇中係冇露背。」Kay表示拍得很開心，冧爆感激老公張繼聰：「工作人員都好照顧我，可能係張繼聰向佢哋交代過，工作人員不約而同話阿聰叫佢哋照顧我。」

早前揚言力追唐詩詠的洪永城，昨有幸與「女神」孖住企，更細聲講大聲笑，看來成功在望！與羅仲謙傳緋聞的蔡思貝，跟謙仔「正印」楊怡亦有傾談。過氣情侶胡杏兒及黃宗澤（Bosco）則顯得尷尬，雖然杏兒已有金融才俊新歡Phil，但與舊愛碰頭仍很避忌零交流，企第一排的兩人中間夾着鄭嘉穎及Kay，雖然Bosco有望向杏兒方向，杏兒卻刻意望向另一邊。提到演出的內地節目《奇妙的朋友》被指鼓勵私下養黑猩猩，杏兒解釋沒可能：「拍時自己都有少少受傷，但我諗唔到自己有啲潛質養小動物，照顧小動物好辛苦。」

蕭正楠愈肥愈愛

視帝黎耀祥獨挑大樑宣傳《梟雄》，提到另一套孭飛的《巾幗梟雄之諜血長天》遲遲未播，他認為與當中的「雞姦戲」無關。其參演的亞視劇《影城大亨》版權也獲無綫購入，他謂體諒亞視：「雖然搞唔清邊個係老闆，但希望佢哋解決到問題。」

同場的蕭正楠（Edwin）昨日38歲牛一，女友黃翠如與他在微博隔空傳情，更封他為「blue god（男神）」，Edwin則冧爆改歌詞回女友：「無懼世事變改，還是愈肥愈愛。」
文：影視組

推介

祝酒

東張西望