「劉松仁」這名字在娛樂圈從來是「遙」不可及，事關相約劉松仁受訪，從來不是一件容易的事。過去數年，松哥大量減產，一方面專心籌備其「人生大project」舞台劇《利瑪竇》，另一方面全神貫注「服務」身體。劉松仁坦言，現在的他，不再糾結過去幕前的五光十色，不回頭看也不埋怨，嘗試學習享受以及體會上天給另一階段的他的試練。

劉松仁為音樂劇《利瑪竇》衝破心理關口

因為音樂劇《利瑪竇》的關係，「莫名其妙」令劉松仁衝破心理關口，接受傳媒訪問！劉松仁早前與導演黃俊達接受《星島頭條》訪問，雖然在劉松仁口中，一直聽從導演黃俊達，不過實情是只要有劉松仁的地方，身邊總有一班年青人相伴在旁，有人會與他研究《利瑪竇》的綵排情況；亦有人會與劉松仁風花雪月，導演黃俊達笑說：「其實係互相睇大家嘅頭，我哋一直都冇話要邊個做主，呢個係一個確實嘅事件，一個咁重要嘅人物嚟到中國呢個地方，去分享佢嘅事蹟，已經係重要嘅事，所以我哋嘅選擇唔係要邊個去行，而係本身有連帶。」

《利瑪竇》從醞釀到排練用了5年時間，在2019年上映至今，前後合共歷時近10年，問到劉松仁今次是否人生最大project？他說：「我做咗電視已經幾十年，喺動作片入面差唔多死過好多次，係一線之差，但係我唔講，總之係遇咗好多次好危險，係受傷受得好重傷嘅事，不過係唔死得，咁我就話佢（指上天）留番我條命，梗係想我做啲嘢，我差一步真係會死，所以喺我心裡面係一直有呢個感覺。直到神父叫我做《利瑪竇》，完成咗呢套戲，出嚟嘅反應，大家都好滿意同開心，我先知道原來佢留我係想我做呢件事。好奇怪，我喺電視做咗咁多年，估唔到最後係做舞台劇，好似埋砌咗前面，原來就係為咗做呢個舞台劇。」

劉松仁現階段全神貫注在自己身體

劉松仁又稱：「我上面仲有個神父，神父上面仲有其他人，好多嘢都係綜合，大家各自有付出，大家又志同道合，呢個合作對我嚟講係好享受。後生嘅時候，喺麗的出去新藝城，同導演、編劇、演員成班人創作係有呢種感覺，但之後幾十年都冇，好多時都係孤軍作戰，去到而家呢個時候，仲有番一次，真係好正，你唔會expcet呢個年紀仲可以有咁嘅享受，同一班人一齊投入去做一件事，所以我每一次睇到好感動，有呢個moment真係執到！」

當日劉松仁拍完TVB劇集《華麗轉身》後，毅然放下多年的演員工作，轉身走到舞台，專心一意策劃、執導及創作《利瑪竇》，不過當問到劉松仁現階段是否專注這音樂劇？劉松仁竟然來過反高潮，他說：「唔係呀，我而家係全神貫注喺我自己身體，我成日話我喺《利瑪竇》係打雜，佢哋需要我做乜咪做乜。」多年來，坊間對劉松仁的身體狀況有不少傳言，對於外界的揣測，劉松仁淡然地說：「要打開隻眼睇清楚啲。」其後劉松仁的一番夫妻論，進一步令人了解目前狀況：「我以前拍戲為主，老婆次要，佢唔可以阻礙我嘅工作，咁點樣呢？佢咪買餸煮飯，返嚟服侍我喇、除鞋除袜喇，病又要陪睇我醫生，因為我以工作擺喺第一位，佢服務我，我去服務工作。」

劉松仁錫住身體養精蓄銳

劉松仁續說：「點知幾十年之後，老婆𨀤低咗、病咗，唔可以服侍我，咁我點？咁咪我服侍返佢，幫佢買餸煮飯，返嚟唔好做嘢，我幫佢換鞋，係咪應該咁呀？我嘅心態就係咁，以前我身體就係咁，我利用身體，服務我想做嘅工作，服務我嘅慾望，而家我身體好似個老婆咁𨀤低咗，咁咪問返佢轉頭，想你我點呀，咪一樣。以前我鍾意食啲嘢，唔會理對身體有冇壞，我而會問下身體，食咗啲嘢對你有冇壞？而家咪到老咗嘅呢個階段，好公平呀，佢服務咗你咁多年，捱壞咗。」

再問劉松仁目前的人生是否去另一個境界？他斷然地說：「唔係境界，係另一個階段，生老病死嘛，你想唔經過呢啲階段咩？個個都要經歷，同埋係你覺得佢唔好啫，其實嗰個階段係畀啲唔同嘅嘢你，嗰啲先係正！」笑問得到最正是甚麼東西？劉松仁笑說：「得唔到最正就講得出，得到最正就未講得出，每個階段都有佢正嘅嘢，你唔喺嗰個階段，就唔會有感覺，要喺嗰個階段，又唔好嚮往以前，我以前係點呀，而家冇咗，你就會埋怨。做人唔好埋怨，向前睇，究竟得到啲乜嘢？究竟想通過呢個階段畀乜嘢你，你就會嚮往，個人就會積極。如果唔係你就會好沮喪，因為你一路失去，以前行得咁快，而家唔得以前可以自己着鞋，但係而家唔得，你會沮喪，而家着唔到鞋，究竟呢個感覺佢想畀乜嘢我？你懷住一個感恩嘅心情，去嚮往呢個階段所畀你嘅嘢，我而家都學緊呢樣嘢，唔同階段咪學習唔同嘅嘢。」生活態度看似瀟洒？但劉松仁說：「瀟唔瀟洒唔係呢個階段，係人嘅問題，（好多人都會埋怨）好多人嘅意思係普通人，我唔係普通人，我係劉松仁，分別咪喺呢度！」

黃俊達難忘劉松仁分享與媽咪相處

在旁的黃俊達亦說：「松哥成日分享同佢媽媽喺公園晒太陽，嗰啲時光好特別，嗰段時間佢媽媽身體冇咁好，但係呢一段時間可以好close，有時人喺啲唔好嘅時間，反而睇到嘅嘢係更加真，更加好嘅嘢，有時松哥會同我講搭巴士，話返我知呢架巴士去邊度係最近，呢啲係好得意嘅嘢，係佢嘅人生態度。」劉松仁接着說：「都要遇到有緣嘅人，你唔係笠亂分享，遇到一個能夠分享你嘅經驗，係好難得，要好感恩。好似傾偈，唔係得你一個人講，對方要有反應，嗰個享受要珍惜，以前我唔識。我哋呢個年紀會好珍惜，呢個唔係必然，咁咪感恩，感恩嘅時間多啲，後生嘅時候忙啲，得個忙字，都唔知為乜。」

劉松仁曾在訪問中表示堅拒重返幕前，今次訪問中，劉松仁的心態仍然沒有變：「我根本從來都冇諗住拍戲，後生拍戲因為有錢先拍，拍戲洗晒啲錢，唔得喇咪繼續拍，我又好彩，每次冇錢嘅時候，又有人搵我喎，變咗由後生到40幾歲都唔識儲錢，到咗40幾歳先識諗，我唔係一世都做小生喎，唔得喎，諗吓要儲番啲錢。」劉松仁叮囑年青一輩千萬不要看學：「我係好感恩，我未試過冇戲拍，呢啲唔係你叻，係上天錫你，好唔好，梗係好，所以晚年要回饋，佢錫你係有原因，要將得到嘅愛要分享出去，話畀人知可以接收到呢樣嘢。」

《利瑪竇》三度公演起用原班人馬

另一方面，今次《利瑪竇》三度公演，演員起用原班人馬陣，其中包括徐偉賢和何洋（Ernestine），劉松仁說：「佢哋係我早期搵佢哋，係頭一批搵嘅演員。」徐偉賢回想當日被劉松仁邀請演出的情況：「記得喺演出前2年，松哥親自搵我嚟講呢個演出大計，我自己有啲緊張同感動，嗰陣佢逐隻字，逐場戲同逐個角色咁話畀我知，喺嗰3個鐘已經畀佢嘅誠意感動到，再加上我哋有同一個信仰，畀我嘅意義更加大。」他續說：「做咗2次，中間經歷疫情，有一場戲好係好有共鳴，講利瑪竇坐船去中國宣教，經歷過好多風浪，我哋喺呢3年都經歷過好多風浪，相信再踏足舞台做第3次，我相信可以搵到好多氧份加入去角色，可以點樣做到更加好。」

何洋原來係劉松仁師姐

何洋與劉松仁第一次見面，原來亦很難忘：「啱啱撞返松哥，講番第一次見面嘅情況，嗰陣我喺北京跟緊另一個劇團演出，演出完同其他演員去食嘢，見到有個男人戴住cap，自己一個人喺度撳電話同食嘢，完全認唔到松哥，之後先發現。其實我哋跟同一個歌唱老師，我係師姐，佢係師弟，咪走去同師弟打招呼，仲交換咗電話。有一日『小松鼠』打畀我，約我出嚟傾偈，講吓個角色，咁我嗰陣冇嘢撈，劉松仁搵我喎，唔係普通人喎，咁咪做囉。」

導演黃俊達受疫情影響安排

經歷過後，導演黃俊達有感而發地說：「我哋過去幾年都冇停過，本來有幾個唔同嘅安排，好似去好多地方公演又或者內地巡演出，之前都中止或者改時間，但係我哋都喺度重新安排同建立過，而家暫時係音樂劇方面，仲喺度，醞釀緊其他嘅方式，我哋都希望可以多啲人睇完套戲，對環境同自己嘅生命都可以有多啲希望，呢個都係好緊要。」

撰文：Grace Ho

攝影：羅安強

王梓軒服裝贊助：Barbour