相信大部分演員都最怕與BB演對手戲，就連好戲之人劉松仁及蘇玉華亦不例外，日前二人與BB拍劇，豈料一個鏡頭已狂食NG，就算幾好戲都冇用，慘！

日前劉松仁、蘇玉華與兩個BB仔演員拍攝無綫新劇《男人之苦》，雖然大家法寶盡出，但兩位「B大佬」一埋位就是喊，簡單如一個飲奶鏡頭都狂NG，搞到兩位好戲之人都束手無策，大嘆無奈！

事後，二人都坦言最怕拍戲遇上「B大佬」，蘇玉華慨嘆：「BB係一種完全不受控制嘅，大家完全溝通唔到，所以同佢哋拍嘢，真係要好有耐性同愛心！其實之前我都有幫屋企人湊過小朋友，識得抱BB，手勢算好純熟嘅喇！（有冇諗過生BB？）暫時冇諗過喎！事業為先啦！不過我都鍾意小朋友，玩人哋嘅先囉！」拍罷新劇後，伊人將為舞台劇《傾城之戀》綵排，十分忙碌。

劉松仁話小兒科

至於自言常與BB演對手戲的劉松仁，對於這兩位小演員的「惡行」，他認為只屬小兒科：「佢哋都算乖噶喇！都算易氹，有啲小演員真係好難頂嘅！會歇斯底里咁喊，唔知點收科！」