無綫劇《名媛望族》播映兩周，網友仍熱談江美儀出動黑絲艷舞色誘劉松仁，松哥和江美儀加埋過百歲的情慾戲極重口味，網友迴響甚大。江美儀日前在中環接受本報專訪，她也重施故技—黑絲襯紅裙。

江美儀在娛圈工作超過15年，她自09年由亞視過檔無綫，雖有機會參演重頭劇，直至最近在《名》劇露肩晒腿，加上一對黑絲襪才成為坊間熱爆話題。對於一直默默耕耘的江美儀來說，這一露上位都算欷歔，但她卻不認同說：「唔會喎，如果我江美儀唔係平時咁認真做嘢，單憑一對黑絲襪，唔會帶畀我咁多，冇根基嘅話，一對黑絲襪眨吓眼就過，家觀眾識欣賞層次，正因為咁，演員先會放開自己嘅枷鎖。」

江美儀在《名》劇中演繹好勝三奶易懿芳，為跟幾房爭寵大耍手段，她不時賣弄風情討好風流老爺，但結局還是要執包袱離開，輸了感情，但現實上卻憑這幕戲賺盡人氣，她興奮說：「我開心㗎，冇諗過一對絲襪會引起大家注意，我都聽到網上瘋傳嗰幕，我呢排開工見到張智霖同吳鎮宇，佢哋都話睇過，呢條片係咪可以直逼江南style？」網友和觀眾指江美儀賣誘惑，她卻謙說：「從頭到尾冇覺得江美儀誘惑，根本拉唔上關係，我只係爽直，似男仔嘅女人。」

其實拍攝這類情慾戲，演員有苦自己知，江美儀慶幸對手是有默契的松哥，她明知跳舞是弱項，向來都是獻醜不如藏拙，但松哥收到劇本後便不停上網搜集資料，讓拍檔改善缺點，她說：「松哥喺YouTube搵咗十條有關艷舞嘅片畀我睇，步伐、衣着同表情都逐條分開叫我跟住參考做。」

為了視覺效果，江美儀跟着照做，出來竟有驚喜，談到工作態度嚴謹的松哥，她說：「同佢拍戲唔係易事，係壓力，不過我相信有壓力先有動力。宜家出嚟效果咁好，我多謝佢都嚟唔切。」當中一場自摸戲，廠內的攝影、燈光和道具工作人員多對眼緊盯下，江美儀直言有尷尬感覺，NG後還是頂硬上，她阿Q精神上身說：「我猛咁同自己講，作為專業演員要專心focus拍好呢場戲。松哥又喺側邊，佢見到都忍唔住教我點摸，佢自己仲示範一次畀我睇。」估不到松哥竟是情慾戲高手。

出動熱咖啡戰衣

江美儀的艷舞look被揭是18年前汪明荃（阿姐）演繹《熱咖啡》的籠底戰衣，她說：「我知，證明阿姐同我身形差唔多，我都唔使改，阿姐都着得，你話有幾性感。其實件舞衣比泳衣仲保守，我着嘅時候仲着咗肉色跳舞衫打底，肉色絲襪外先着黑絲同襪帶，性感同誘惑只係錯覺同意識。」

對三奶一角，江美儀又愛又恨：「我絕對同情佢，作為女人，佢實在太委屈，講手段楊怡嘅四奶仲犀利，演呢個角色過足癮，仲可以豁出去。做有手段嘅女人好攰，成日要防呢個，對付嗰個，我自問本身性格大癲大肺，一定做唔到。」她獲網友力撐可憑三奶拎走今屆無綫台慶頒獎禮的最佳女配角，她說：「我唔係為攞獎而演好啲戲，過去幾年我都係陪跑，不過今年有信心㗎，得唔得獎真係唔重要，起碼我食到呢個timing，我當自己賺咗㗎啦。」