63歲的劉松仁從影近40年，代表作無數，最近因《名媛望族》連場情慾戲再度紅起來，松哥的專業演出沒令太太不安，他自言娶了個專業的太太，其實經常與美女拍檔，松哥也甚少傳緋聞，即使他承認男人必然是鹹濕、不檢點，除因他可控制慾望，最重要的，還是與太太互相信任。

撰文：羅美倫 攝影：林德雄

松哥在《名媛望族》中分別有韓馬利、陳玉蓮、江美儀、楊怡四個老婆，還有年輕的賈曉晨做情婦，一個男人周旋五個女人之中，自然有難度，松哥說：「主軸要拖四個老婆一個情婦有仔有女，所有關係由一個人散開去，處理唔好就破壞整體性，要用好多精神處理。現實中多老婆都唔係好事啦！呢個擺平嗰個幾辛苦呀！」妻妾成群情慾戲多，松哥坦言演繹不成問題，只是不喜歡觀眾將焦點放在這些戲上：「成個戲都唔係講呢啲，係講一夫多妻除咗快感外，有好多唔開心，對女性又唔公平呢啲社會問題，依家搞到件事好狹隘。」

女拍檔橫跨幾代

松哥身邊的女拍檔來自不同年代及不同年紀，男演員就是有這樣的優勢，不過他坦言優勢是要付出代價的：「要自己爭取㗎，見辛康納利咁老仲咁型，會諗我點可以做到呢？生活要檢點、保養自己唔好亂食嘢、要做運動，年紀越大越要做多啲，我喺中國養生學落咗好多苦功，40歲開始練功係為咗60歲，唔做嘢退化仲快，藝術生命就有限制，依家我仲可以做到50幾歲而有說服力，背後做咗好多嘢㗎！」他認為凡事不要只看表面，尤其年輕人要了解別人背後付出甚多，但如他們只為搵錢，那就沒所謂了。

那松哥對新一代小生有何看法？他謙虛的說：「包括我在內，都有學習空間，要虛心學習，彭于晏當年做我個仔，合作咗兩次，佢進步好多，我曾經同佢講過一句話，要記住呢五年，點紅都唔可以覺得自己紅，仍要虛心，其實所有小生、花旦都唔好覺得自己得，因為有太多進步空間，香港演員先可以同內地、台灣、世界演員爭一日長短。」

自認鹹濕唔檢點

由小生到中生，松哥都屬風流倜儻型，只是，他的戀聞不多，緋聞更近乎零，難道真的定力夠？松哥笑說：「因為你哋高抬貴手囉！」還是他做人夠檢點、識避忌？松哥哈哈大笑：「我有檢點亦有唔檢點嘅時候，由後生到依家，我話我好檢點呃你咋，你問所有女演員都知我唔檢點，哈哈哈……緋聞呢啲嘢部份可以自己控制，部份係傳媒高抬貴手，部份係上天對我恩賜。」唔鹹濕就少緋聞？松哥竟然抗議：「我唔鹹濕就唔係男人啦！唔係男人點演戲呀！」還是從不愛用緋聞來宣傳？他說：「我都唔鍾意宣傳嘅，緋聞有啲避忌到有啲避忌唔到，情到濃時避乜鬼忌吖。」歸根究柢，就是松哥愛惜自己及另一半，將偷食慾望收起來，不會做傷人害己的事。

雖說松哥愛錫比他年輕20年的太太，但不停地工作兼親熱戲避無可避，太太會呷醋會投訴嗎？松哥直截了當的答：「冇！佢係個好專業嘅老婆，其實我都分配到時間，好似拍完《名媛》都同佢去咗四次旅行。」

與太太互相信任

相傳松哥某年在飛往加拿大的航班上跟太太一見鍾情，松哥聞言笑笑說：「呢個係一個錯誤決定，然後自己抱憾終生，哈哈哈……」工作時甚嚴肅的松哥，講起太太反而輕鬆，問到太太是否很喜歡看他的戲，松哥說：「好少，佢唔係成日睇，但佢話呢個劇好睇，佢經常飛，又冇癮追戲，我以前啲戲佢都唔追嘅，以前嘅我都唔係佢偶像，但經20年嘅經營，依家開始係，哈哈……」

談到與太太的相處之道，松哥坦言最重要是互相信任，給對方適當的空間，早前劉兆銘太太離世，松哥就因此跟太太好好溝通過，他說：「發現有病有痛苦係自己承受，旁人點錫都只可以安慰，痛始終係自己，生命到最後係一個人走，我哋一齊參透緊，學習點面對孤獨，有相互關係，就會更加愛錫自己，更唔會負累對方，我越嚟越鍾意睇到死亡，畀我感到生命完結，好似畫畫完成最後一筆，好靚，啟發好多，雖然老婆未到呢個年齡，但可以同佢分享我嘅睇法。」

不靠攞獎肯定演技

近日觀眾、網民熱捧劉松仁為視帝黑馬，他聞言只笑道：「我係黑馬好多年啦！其實我同無綫有秘密協議，唔畀視帝我至拍，唔係我邊有得拍呀！」松哥是公認好戲之人，縱橫娛樂圈近40年，總有一、兩個各樣機構頒贈的最佳男主角獎傍身，但他從不看重虛銜：「對我嚟講冇乜意思，我唔需要用呢啲肯定自己，唔係話自己好，但演技好唔好我自己知，唔使等人話你知。」

睇好楊怡馬明

松哥覺得不需要靠獎項來幫助事業，除了拍戲外，其他活動都不會多做，尤其到了這個年紀，他笑言：「攞咗獎嚟太多戲我都接唔到，體力有限，畀啲獎後生嘅好，係一種鼓勵，對佢哋事業好。」

既然公認好戲，今年視帝由一人一票選出，松哥豈不勝算大增？他說：「我啲觀眾比較成熟，唔會上網投票，論戲我已攞咗好耐，所以唔使畀我，無綫、觀眾畀唔畀I don’t care，最緊要作品好。」

那松哥睇好哪個會當選視帝及視后？他笑罵記者靠害，然後說：「唔知，我都冇睇其他劇，因為冇睇所以一定係捧鍾家嘅人，馬國明、楊怡啦，人梗有私心，同佢哋建立咗感情，佢哋確實做得唔錯。」